एम्बुलेन्स सेवा मानवतामा हुनु पर्ने गुणको नमूना : नगरप्रमुख विष्ट

२९ जेठ/थाहा नगरपालिका प्रमुख लवशेर बिष्टले दुःखमा सहयोग गर्ने उद्देश्यले खरिद गरिएको एम्बुलेन्स सेवा ले मानवतामा हुनु पर्ने गुणको नमूना प्रदर्शन गरेको बताउनुभयो ।

मकवानपुरको थाहा नगरपालिका वडा नं. १ ओखरबजारका बासिन्दाहरुले खरिद गरेको एम्बुलेन्सको शनिबार आयोजित उद्घाटन कार्यक्रममा थाहा नगरका प्रमुख विष्टले सबैको सहभागितामा मात्र मुलुकको विकास हुने बताउनुभयो ।

निःशुल्क एम्बुलेन्स सेवा अभियान मानव हुनुको गुण भएको समेत नगर प्रमुख विष्टले बताउनु भयो ।  

कार्यक्रममा निःशुल्क एम्बुलेन्स संचालक समितिका संयोजक सुरेन्द्रमान प्रधानले ओखरबजारका युवाहरुको अगुवाइमा भएको निःशुल्क एम्बुलेन्स संचालनको योजना सफल भएको बताउनु हुँदै अब कोहि पनि गरिब असहायले एम्बुलेन्सको अभावमा मर्नु नपर्ने बताउनु भयो ।

उहाँले वार्षिक रुपमा जन्मोत्सव, विवाहलगायतका खुसीयालीमा गरिने अनावश्यक खर्चहरुको कटौति गरी एम्बुलेन्स संचालन कोषमा आवद्ध हुन आव्हान समेत गर्नुभयो ।

हालसम्म एम्बुलेन्स खरिदका लागि कुनै पनि प्रशासनिक खर्च नभएको र अभियानमा क्रियाशिल व्यक्तिहरुले निजी खर्च गरिरहेको जानकारी दिँदै कोहि पनि असहायहरुलाई पूर्ण रुपमा निःशुल्क सेवा दिन कार्यविधि तयार भइरहेको बताउनुभयो । 

२ बर्ष ६ महिना अघि नेपाल संवत् न्हूदँया भिन्तुनाको अवसरमा घोषणा गरि स्थानीयबाट ३ दिनमा करिब २४ लाख रुपियाँ संकलन गर्न सफल भएका थिए ।

निःशुल्क एम्बुलेन्स संचालक समितिले निश्चित रकमको अक्षय कोष स्थापना गर्ने लक्ष्यका साथ कार्य संचालन गरिरहेको संयोजक प्रधानले जानकारी दिनुभयो । 
 

सो अभियानमा ओखरबजार घर भई देशविदेशमा रहेकाहरुको समेत आर्थिक सहयोग रहेको छ ।