आज मकवानपुरमा कोरोना संक्रमण शुन्य, आजै ४१ जनाले जिते कोरोना

मकवानपुरमा आज कोरोना संक्रमण हुनेको संख्या ‘शुन्य’ रहेको छ ।

जिल्लामा आज १४ जनाको एन्टीजेन विधिबाट कोरोना परीक्षण गर्दा संक्रमण पुष्टि हुनेको संख्या ‘शुन्य’ अर्थात कसैलाई पनि कोरोना संक्रमण पुष्टि नभएको हो ।

आईतबार एन्टीजेनबाट १४ जनामा गरिएको परीक्षणमा संक्रमण पुष्टि हुनेको संख्या शुन्य रहेको स्वास्थ्य कार्यलय मकवानपुरले जनाएको छ ।

आज हेटौंडा उपमहानगरपालिका भित्रका १२ जना र मनहरी गाउँपालिका भित्रका २ जनाको एन्टीजेन विधिबाट कोरोना परीक्षण गरिएको थियो ।

यसैगरि आज जिल्लामा कोरोना जित्नेको संख्या ४१ जना रहेका छन् । घरमा उपचाररत ३५ जना र संस्थागत आइसोलेसनमा उपचाररत ५ जना संक्रमित गरी ४१ जनाले कोरोना जितेको कार्यलयले जनाएको छ । यो संगै जिल्लामा हालसम्म १४ हजार ५ सय ४ जनामा कोरोना पुष्टि भएको छ भने १४ हजार १ सय २५ जनाले कोरोना जितेका छन् ।

जिल्लामा पछिल्लो २४ घण्टामा थप एक संक्रमितको मृत्यु भएको छ । मृत्यु हुनेमा मनहरी गाउँपालिका वडा नंबर १ की ९३ वर्षीया वृद्धा महिला रहेकी छन् ।

वृद्धाको शनिबार साँझ उपचारको क्रममा हेटौंडा अस्पतालमा मृत्यु भएको जिल्ला स्वास्थ्य कार्यलय मकवानपुरले जनाएको छ ।

यो संगै कोरोनाको कारण मनहरी भित्रका मृत्यु हुनेको संख्या १२ जना पुगेको छ भने जिल्लामा जिल्ला भित्रका मृत्यु हुनेको सख्या १ सय ५७ पुगेको कार्यलयले जनाएको छ ।

जिल्लामा हाल १ सय ४९ जना संक्रमित घरमा र २९ जना संक्रमित संस्थागत आइसोलेसनमा उपचाररत रहेका छन् ।