आग्रा स्वास्थ्य चौकी भवन निर्माणको आम्दानी खर्च सार्वजनिक
३० हजार १ सय ३४ रुपैयाँ बचत

साउन १९/च्वाइस नेपाल र थाहा नगरपालिकाको संयुक्त लगानीमा थाहानगरपालिका ८ मोरियामा निर्माण भएको स्वास्थ्य चौकी भवनको निर्माणका क्रममा भएका आम्दानी र खर्चको बिवरण मंगलबार सार्वजनिक गरिएको छ ।

स्वास्थ्य चौकी भवन निर्माण समितिका अध्यक्ष उत्तम थापाको अध्यक्षता एवम्  वडा अध्यक्ष टीकाराम रुम्बाको प्रमुख आतिथ्यतामा भएको सार्वजनिक सुनुवाइ कार्यक्रममा सम्पुर्ण आय ब्यय बिवरण सार्वजनिक गरिएको हो ।

१ करोड ५२ लाखमा निर्माण सम्पन्न गर्ने गरि स्टमेट गरिएको स्वास्थ्य चौकी भवनको निर्माणमा क्रममा १ करोड ५० लाख १९ हजार नगद प्राप्त भएकोमा १ करोड ४९ लाख ८८ हजार ८ सय ६६ रुपैयाँ खर्च भएको आज सार्वजनिक गरिएको आम्दानी खर्च विवरणमा उल्लेख गरिएको छ ।

निर्माण सम्पन्न हुँदा ३० हजार १ सय ३४ रुपैयाँ बचत भएको निर्माण समितिका अध्यक्ष उत्तम थापाले बताउनुभयो ।

स्वास्थ्य चौकी भवन निर्माणका लागि च्वाईस नेपालले १ करोड र थाहा नगरपालिकाले ५० लाख लगानी गरेको च्वाइस नेपालका प्रताप घिमिरेले बताउनुभयो ।

सार्वजनिक सुनुवाई कार्यक्रममा च्वाईस नेपालका कुल चन्द्र तिवारी, प्रताप घिमिरे, वडा सदस्यहरु, इन्द्रायणी माबिका प्रधानाध्यापक नारायाण बहादुर कार्की, अनुगमन समितिका पदाधिकारी, स्थानीय बुद्धिजीवी लगायतको उपस्थिति रहेको थियो ।