हेटौंडामा ट्रकले ठक्कर दिँदा म्याजिक भ्यानमा सवार ९ जना घाइते

  हेटौंडामा ट्रकले ठक्कर दिँदा म्याजिक भ्यानमा सवार ९ जना घाइते भएका छन् । 

बुधबार पूर्वपश्चिम राजमार्गअन्तर्गत हेटौंडा–१९, सान्नानिटारमा मनहरीबाट हेटौंडा जाँदै गरेको ना १ ज ३१६७ नम्बरको म्याजिक भ्यानलाई सोही दिशाबाट हेटौंडातर्फ जाँदै गरेको ना ५ ख ९६८४ नम्बरको ट्रकले पछाडिबाट ठक्कर दिँदा दुर्घटना भएको हो । म्याजिक भ्यान साईडमा रोकेर यात्रु चढाइरहेको बेला ट्रकले ठक्कर दिएको प्रहरीले उल्लेख गरेको छ ।

दुर्घटनामा परी राक्सिराङ–२ की २१ वर्षीया रिता राना मगर, हेटौंडा–११, थानाभर्याङका ३६ वर्षीय बिमल पुलामी मगर, हेटौंडा–१९, नेवारपानीका ३५ वर्षीय होईसेल लामा, ३३ वर्षीय लोक बहादुर मोक्तान, २ वर्षीया कुश्मि मोक्तान, ५६ वर्षीया ठूलिमाया बम्जन, ५६ वर्षीया लाल कुमारी स्याङ्तान, ३० वर्षीया कविता नेगी र म्याजिक चालक मनहरी–९, खरंगाका ४३ वर्षीय अम्बर सिंह डाँगी घाइते भएका छन् ।

घाईतेहरुको उपचारका लागि हेटौंडा अस्पताल लगिएको प्रहरीले जनाएको छ । लोक बहादुर मोक्तानको २ वर्षीया छोरी कुश्मि मोक्तानको टाउको, मुखमा चोट लागी अवस्था गम्भीर रहेको छ । कुश्मिलाई थप उपचारका लागि भरतपुर पठाइएको जिल्ला प्रहरी कार्यालय मकवानपुरले जनाएको छ । अन्य घाइतेको अवस्था सामान्य रहेको छ ।