श्रेष्ठ पक्षले पार्टी नफुटाउने,एमसिसिको बिरोध जारी राख्ने।

नेकपा माओवादी केन्द्रको केन्द्रीय समितिको बैठकमा माओवादी केन्द्रका नेता नारायणकाजी श्रेष्ठ पक्षले संसदबाट पारित एमसीसीको विरोध गर्ने भएको छ । माओवादी केन्द्रका अध्यक्ष प्रचण्डले एमसीसीमा भएका विवादास्पद बुँदालाई व्याख्यात्मक घोषणासहित पारित गर्नका लागि मतदान गरेका थिए । तर सो निर्णयमा श्रेष्ठ पक्षले विरोध गरेको थियो । यता अमेरिकाले भने व्याख्यात्मक घोषणालाई स्वीकार गरेको बताइसकेको छ । एमसीसीको केन्द्रीय कार्यालयका साथै अमेरिकी दूतावासले व्याख्यात्मक घोषणा स्वीकार गरेको भनेको हो । माओवादीमा भने श्रेष्ठ पक्षले एमसीसीको विरोध गरे पनि पार्टी विभाजन नै नगर्ने स्रोतको दाबी छ । अध्यक्ष प्रचण्ड र नेता वर्षमान पुन अनन्तले श्रेष्ठ निवासमै पुगेर छलफल गरेपछि एमसीसीमा फरक मत राख्ने र पार्टी विभाजन गर्ने निर्णयमा नजाने भनेका हुन् । श्रेष्ठले आफू निकटका नेताहरुसँग पार्टी विभाजन गर्ने कि पार्टीभित्रै रहेर अन्तरसंघर्ष गर्ने भन्नेबारे छलफल गरेका थिए । उनलाई अधिकांश नेताले पार्टी विभाजन गर्न नहुने बरु पार्टीभित्रै बसेर अन्तरसंघर्ष गर्नुपर्ने भनेका थिए । त्यसपछि श्रेष्ठले एमसीसीमा जारी केन्द्रीय समिति बैठकमा फरक मत राख्ने र पार्टी विभाजन नगर्ने निर्णयमा पुगेको श्रेष्ठ निकट स्रोतको दाबी छ ।