लोभ लालच देखाएर मत माग्न आउनेसँग सचेत रहनुस् : डिना, गठबन्धनको विजयी सुनिश्चित : छिन्तु

 मकवानपुर । नेपाली काँग्रेसकी सहमहामन्त्री एवम् सत्तारुढ गठबन्धनकातर्फबाट मकवानपुर १ की प्रतिनीधि सभा उम्मेदवार महालक्ष्मि उपाध्याय (डिना) ले संविधान, लोकतान्त्रिक गणतन्त्र, परिवर्तन र व्यवस्था मास्न खोज्नेहरु विभिन्न लोभ लालच देखाएर जनताको घरदैलोमा मत माग्न आइरहेको भन्दै सचेत रहन आग्रह गरेका छन् । बुधबार बकैया–६ कर्मचुलीमा भएको निर्वाचन लक्षित सभामा उनले सो आग्रह गरेकी हुन् । बकैया गाउँपालिकाको जनताका समस्याका बारेमा आफू जानकार रहेको उल्लेख गर्दै उनले यस क्षेत्रको मुख्य समस्या बाटो, सिंचाई र वर्षौंदेखि उपभोग गर्दै आइरहेको जग्गाको प्रमाण पूर्जाका सावल गठबन्धनको विजयी पश्चात प्राथमिकताकासाथ सम्बोधन गरिने बताईन् । “यसअघि सरकारमा पटक पटक पुगेर पनि यहाँका जनताकालागि केही नगर्नेहरु फेरी पनि तपाईहरुलाई मत माग्न आउँदैछन् सजग रहनुहोला” उनले भने “म विजयी भएर गएपश्चात यहाँहरुको जग्गाको लालपूर्जाको समस्यालाई केन्द्रबाट सम्बोधन गरि घरघरमा पूर्ज वितरण गर्न आउँनेछु” । हाल युवाहरुले आफूले उठाईरहेको सवालहरुलाई बुझेको र मतदान गर्न आतुर रहेको बताउँदै उपाध्यायले आफ्नो विजयी सुनिश्चित रहेको दावी गरिन् । यसैगरि, सभामा बोल्दै नेकपा (माओवादी केन्द्र) बागमती प्रदेश कमिटि उपाध्यक्ष एवम् सत्तारुढ गठबन्धनका तर्फबाट मकवानपुर १ (क) प्रदेश सभाका उम्मेदवार प्रेमबहादुर पुलामी (छिन्तु) ले गठबन्धनका उम्मेदवारहरुको विजयी सुनिश्चित रहेको दावी गरेका छन् । हाल गाउँ नगरका विभिन्न स्थानमा सत्तारुढ गठबन्धनका पक्षमा भएको जनमासको लहर देखेर प्रतिष्पर्धीहरु तर्सिसकेको भन्दै मानशिक रुपले परास्त भइसकेको उनले उल्लेख गरे । प्रतिष्पर्धीहरुले जनतासँग मत माग्न आउने कुनै आधार समेत नरहेको उनले जिकिर गरेका छन् । आफू प्रदेश सांसद रहँदा बकैयाको थुप्रै विकास निर्माणकालागि आवश्यक बजेट विनियोजन गर्न पहल गरिएको उनले उल्लेख गरे । कतिपय योजनाहरु निरन्तर अगाडि बढाउनुपर्ने खालको भएको हुँदा पुनः जिम्मेवारी लिन आफ्नो उम्मेदवारी रहेको उनले बताए । सभाअघि बकैया – ५ का विभिन्न टोलमा घरदैलो गर्दै मतदाता समक्ष दुबै उम्मेदवारले मत मागेका थिए ।