लालबहादुर थापाको घरछेउमा गठबन्धनको भेलाः बानियाँ भन्छन्–थापाकै परिवारको मत पाउँछु

मनहरी–कात्तिक ३ गते । मकवानपुर क्षेत्र नं २ अन्तर्गत प्रदेश सभा ख का उम्मेदवार इन्द्रबहादुर बानियाँले यसपटक एमालेका उम्मेदवार लालबहादुर थापाकै परिवारले आफूलाई मतदान गर्ने दाबी गर्नु भएको छ ।

राक्सिराङ गाउँपालिकास्तरीय संयुक्त गठबन्धनका कार्यकर्ता भेलालाई सम्बोधन गर्दै बानियाँले आफ्ना प्रतिस्पर्धी थापाकै परिवारबाट आफूलाई मत प्राप्त हुने बताउनु भएको हो ।

तत्कालीन बाम गठबन्धन हुँदा बनेको डोरमणि पौडेलको सरकारले राक्सिराङ गाउँपालिका लगायत ग्रामीण भेगलाई उपेक्षा गरी बजेट नहालेको प्रसंग कोट्याउँदै बानियाँले गठबन्धन सरकार आएपछि यस क्षेत्रमा यथेष्ट बजेट हालेको बताउनुभयो ।

उहाँले अहिले संविधान पक्षधर र विकासप्रेमीहरु एकातर्फ र संविधान विरोधी केपी ओलीका दासदासीहरु अर्काेतर्फ लागेको आरोप लगाउनुभयो ।

माओवादी केन्द्रका अध्यक्ष हस्तबहादुर मुक्तानको सभाध्यक्षतामा भएको कार्यक्रममा प्रतिनिधि सभा २ का उम्मेदवार विरोध खतिवडा, भौतिक पूर्वाधार विकास राज्यमन्त्री सन्तबहादुर प्रजा, नेपाली काँग्रेस जिल्ला सभापति बुद्ध लामा, नेकपा एकीकृत समाजवादीका केन्द्रीय सदस्य राजाराम स्याङ्तान, प्रदेश क का उम्मेदवार कुमारी मोक्तान लगायतले मन्तब्य ब्यक्त गर्नु भएको थियो ।

तीनैवटा राजनीतिक दलका केन्द्र, प्रदेश, जिल्ला र गाउँ तहका नेताहरुको सहभागिता रहेको थियो भने समानुपातिक तर्फका उम्मेदवारहरुको उपस्थिति कार्यक्रममा रहेको थियो ।