मकवानपुर एमालेमा फेरि खटपट

नेकपा एमाले मकवानपुरमा खटपट देखिएको छ । हिजो बुधवार जिल्ला कमिटी बैठकले नयाँ सदस्यहरुको मनोनयन र जिम्मेवारी बाँडफाँड गरेपछि नेताहरुमा तीब्र असन्तुष्टि देखिएको हो । सामाजिक सञ्जालमै पार्टी छाडिएको,जिम्मेवारीबाट बाहिरिएको,आफ्नो बाटोमा हिँडेको लगायत ब्यहोरा लेखेर उहाँहरुले असन्तुष्टि जनाइरहनु भएको छ । सामाजिक सञ्जालमा लेख्न आँट नगर्नेहरु समेत पार्टीमा असन्तुष्ट भएर बसेको बताइन्छ ।

‘कसैसङ्ग केही गुनासो छैन,गुनासो आफैसङ्ग छ,पश्चाताप आफैसङ्ग छ,राजनीति गर्न जानेकी रहेनछु र अब कोसिस पनि गर्दिन,भयो पुग्यो,अब धेरै नै भयो,विश्राम लिनुपर्छ। मेरो जिन्दगी मेरो हिसाबले चल्छ,अरुको हिसाबले होइन । आज कठोर भएर निर्णय गर्दैछु । घरपरिवार,जागिर सबै छोडेर गरेको राजनीतिक यात्रा अन्त्य ।”

स्थानीय तहको निर्वाचन नजिकिँदै गर्दा आफ्ना मान्छेहरुलाई निर्णायक ठाउँमा उभ्याउन गुटभित्र उपगुटका कारिन्दाहरु सक्रिय रहेको आरोप लागेको छ । सामाजिक सञ्जाल फेसबुकमार्फत पुराना नेता एवम गत स्थानीय चुनावमा हेटौँडा उपमहानगरपालिका १ नं वडाबाट अध्यक्ष पदमा पराजित नेता उत्तम शर्मा न्यौपानेले लेख्नुभएको छ–‘लामो शृङ्खलाबाट बिदा हुने निर्णय गरेँ । बिगतदेखिका सहयोगी मनहरुमा साधुवाद ।’ वडामा त्यतिखेर आफ्नै टिमका अन्य सदस्यहरुले जित्दा उहाँले मात्रै हार ब्यहोर्नुपरेको थियो । अन्तरघातको दोष हालका जिल्ला अध्यक्ष एकलाल श्रेष्ठमाथि लगाइएको छ ।

त्यसैगरी अर्का युवा नेता सानु लामाले फेसबुकमा ‘अहिलेसम्म मलाई योग्य ठानी विभिन्न जिम्मेवारी दिनुहुने सम्पूर्णप्रति हार्दिक धन्यवाद तथा आभार व्यक्त गर्दछु । एकदम अत्यन्तै दुखद मनले एकदमै नचाहेर पनि बाध्यताले यस्ता खाले परिवर्तन हुनु पर्ने परिस्थिति निम्त्यायो जिन्दगीमा ! कोही कसैलाई कुनै खालको दोष नदिइकन कुनै हालतमा अब पार्टीको कुनै खालको गतिविधिमा संलग्न हुँदै नहुने सम्पूर्णमा जानकारी गराउन चाहन्छु,धन्यवाद । अबको दिनको मेरो जिन्दगी फरक हिसाबले चलाउने कोशिस गर्नेछु।’ भनेर लेख्नु भएको छ ।

महिला नेतृ एवम सामाजिक नागरिक अभियन्ता रमिला सापकोटाले पार्टी छाडेको दुई वटा स्टाटस लेख्नुभएको छ । उहाँ जिल्ला समन्वय समिति प्रमुख रघुनाथ खुलालका नातेदार हुनुहुन्छ । उहाँले लेख्नुभएको छ–‘कसैसङ्ग केही गुनासो छैन,गुनासो आफैसङ्ग छ,पश्चाताप आफैसङ्ग छ,राजनीति गर्न जानेकी रहेनछु र अब कोसिस पनि गर्दिन,भयो पुग्यो,अब धेरै नै भयो,विश्राम लिनुपर्छ। मेरो जिन्दगी मेरो हिसाबले चल्छ,अरुको हिसाबले होइन । आज कठोर भएर निर्णय गर्दैछु । घरपरिवार,जागिर सबै छोडेर गरेको राजनीतिक यात्रा अन्त्य ।” जिल्ला सचिवालय सदस्य भइसकेका र मेयर तथा उपमेयरको उम्मेदवारको रुपमा चर्चा पाएका अर्का नेता फुर्बा दोर्जे लामाले फेसबुकमा लेख्नुभएको छ–‘मकवानपुर जिल्ला पार्टी कमिटीको सङ्गठित जिम्मेवारीबाट बिदा लिने दिन पनि आएजस्तो लागेको छ है !’

बुधबारको बैठकमा २८ जना जिल्ला सदस्य मनोनित गरिएको र १३० सदस्यीय सल्लाहकार कमिटी बनाइएको बताइएको छ । केन्द्रीयता लादेर दुई महिनाअघि एमाले जिल्ला कमिटी घोषणा गरिएसँगै मकवानपुर एमालेमा असन्तुष्टि बढ्दै गइरहेको छ ।