गुणस्तरिय शिक्षा र स्वास्थ्यको ब्यवस्था होस् : मतदाता

हेटौंडा, १७ कात्तिक/बागमती गाउँपालिका ३ माझगाउँका मतदाताहरुले नेपाल कम्युनिष्ट पार्टी माओबादी केन्द्र बागमती प्रदेश उपाध्यक्ष एबम् मकवानपुरको प्रदेशसभा १ को(क) का बाम लोकतान्त्रिक गठबन्धनका उम्मेदवार प्रेम बहादुर पुलामी(छिन्तु) लाई गुणस्तरीय शिक्षा, स्वास्थ्य, लगायत भौतिक पुर्वाधार निर्माणको लागि पहल गरिदिन माग गरेका छन् । मतदातासंग भेटघाट गर्ने क्रममा उम्मेदवारी पुलामीलाई मतदाताले उक्त माग गरेका हुन् ।

बागमती गाउँपालिका १ का स्थानीय डोर बहादुर थापाले पुलामीलाई वागमती गाउँपालिकामा प्रदेश सरकार र स्थानिय सरकारले गरेको विकासको लागि धन्यबाद दिंदै थप विकासमा जोड दिन माग गर्नुभएको छ । उहाँले नेता पुलामीले आफ्नो क्षेत्र मा उल्लेख्य विकास गरेको देखिएको भएतापनि थप बिकास गर्नको लागि अनुरोध गर्नुभयो । 

त्यसैगरी सोही वडाका मतदाता भेष बहादुर घिसिङले नेता पुलामीको गृह पालिका समेत बागमती भएकोले त्यहाँको अबस्था र स्थितिको बारेमा उम्मेद्वार पुलामीलाई खासै भन्न नपर्ने बताउनुभयो । पहिलाको बागमती र अहिलेको बागमतीको बिचमा आकाश जमिनको अन्तर भएको भन्दै नेता पुलामीको पहलमा विकास निर्माणले गति लिएको बताउनुभयो ।

बागमती २ का मतदाता बिक्की पहरीले बर्तमान राईगाऊँ, माझगाऊँमा विकासले गति लिएको भएपनि खहरे नियन्त्रण, पुल लगायतका कार्य पुरा हुन अझ बाँकी रहेको भन्दै नेता पुलामीबाट नै यस क्षेत्रका मतदाताहरुले अपेक्षा राखेको बताउनुभयो ।

उम्मेदवार पुलामीले आफु निर्वाचित हुँदा होस वा उम्मेदवार नै नरहेको अबस्थामा होस यस क्षेत्रका जनतालाई साथ नछोडेको बताउनुभयो । ब्यबस्था बदल्न भएको निर्वाचनको कार्यभार पुरा गर्न सफल भएको भन्दै अब अबस्था बदल्न पनि सफल हुने बिस्वास ब्यक्त गर्दै जनअपेक्षा बमोजिम आफुले काम गर्ने प्रतिबद्धता ब्यक्त गर्नुभयो ।