कोरोना जोखिम बढेपछि थाहामा निषेधाज्ञा कडा पारिदै 

थाहा नगरपालिकामा कोरोनाका संक्रमितको संख्या ३ सय नाघेपछि नगरले 
थाहा नगरपालिका भर ४ दिन पूर्ण निषेध हुने भएको छ । 
थाहानगरमा कोरोना संक्रमण दर डर लाग्ने गरी उकालो लागेपछि जेठ ११ गते राती १२ बजे देखि १५ गते राती १२ बजेसम्म ४ दिन पूर्ण रुपमा निषेधाज्ञा गर्ने सिफारिस गरिएको थाहा नगरपालिकाका प्रमुख लवशेर विष्टले जानकारी दिनुभयो । 
थाहा नगरमा नगरस्तरीय कोभिड रोकथाम तथा नियन्त्रण निर्देशन समितिको बैठकले नगरमा कोरोना संक्रमण नियन्त्रण बाहिर जान खोजेपछि निषेधाज्ञालाई कडाइ गर्ने निर्णय गर्दै पुर्ण निषेध गर्न सिफारिस गरेको हो । 
दैनिक उपभोग्य बस्तु किनमेलका नाममा बजार क्षेत्रमा भिडभाड बढेपछि पुर्ण निषेधको निर्णयकोलागि सिफारिस गरिएको पनि प्रमु्ख विष्टले बताउनु भयो । 
प्रमुख विष्टले नगरबासी सँग अहिले संक्रमणको जाखिम उच्च भएको समयमा घरमै बसेर सुरक्षित रहन आग्राह गर्दै स्वास्थ्यमा समस्या आए स्वास्थ्यकर्मी र स्वास्थ्य संस्था तैयारी अवस्थामा रहेकाले तुरुन्त स्वास्थ्य संस्थामा सम्पर्क राख्न पनि आग्रह गर्नु भएको छ । 

निषेधाज्ञा अवधिभर औषधि पसल, कृषि उत्पादन बाहेक सबै व्यवसाय बन्द रहने छन् । 
हाल हरेक दिन विहान ५ बजेदेखि ८ बजेसम्म अत्यावश्यक वस्तु (खाद्यान्न, तरकारी, दूध, माछा मासु) पसल खुल्ला गर्न छुट थियो । तर, अब जेठ ११ गते १२ बजे पछि यी सबै पसलहरु पूर्ण रुपले बन्द हुनेछन् ।
अत्यावश्यक काम परि कोहि कसैलाई दैनिकी चलाउन समस्या भएमा वडाध्यक्ष, थाहानगर उद्योग वाणिज्य संघलगायतमा सम्पर्क गर्न पनि समितिले अनुरोध गरेको छ । 
कृषि उत्पादनका लागि कृषक पूर्ण रुपले स्वास्थ्यका मापदण्ड पालना गरि घरबाट खेतबारी, तरकारी गोदामसम्म र गोदामबाट सिधै घरसम्म मात्र आवतजावत गर्न भनिएको छ । 
बैठकले एम्बुलेन्स, प्रेसका सवारी, तरकारी निकासीका सवारी बाहेक अन्य सबै खाले सवारी संचालनमा रोक लगाउने निर्णय समेत गरेको छ । यसबीचमा, नगर बाहिरबाट आउने सवारी साधन समेत निषेध गर्ने निर्णय गरेको छ । बैठकले निषेधाज्ञाको अवज्ञा गरेको पाइएमा कोरोना संक्रमण अवधिमा लगाइने सबैखाले निषेधाज्ञा अवधिभर पसल सिल गर्ने निर्णय गरेको छ । 
निषेधाज्ञालाई प्रभावकारी वनाउनका लागि उप प्रमुख खड्ग गोपालिको संयोजकत्वमा गठित अनुगमन समिति मार्फत अनुगमनलाई निरन्तरता दिने निर्णय गरिएको छ ।