एमालेबाट निर्वाचित आधादर्जन वडाध्यक्ष गठबन्धनका पक्षमा खुल्नेवाला छन्ः खतिवडा

 कात्तिक । नेकपा (एकीकृत समाजवादी) का स्थायी समिती सदस्य एवम् पूर्वमन्त्री विरोध खतिवडाले गत वैशाखमा स्थानीय तहमा एमालेबाट निर्वाचित झन्डै आधा दर्जन वडाध्यक्ष यसपटक गठबन्धन जिताउन लागेको बताउनु भएको छ । मकवानपुरको ईन्द्रसरोवर गाउँपालिकामा वाम लोकतान्त्रिक गठबन्धनको चुनाव प्रचार प्रसारका लागि निर्वाचन परिचालन कार्यालय उद्घाटन गर्दै खतिवडाले यस्तो बताउनु भएको हो । प्रतिनिधिसभा क्षेत्र नम्बर २ को प्रतिनिसधसभा सदस्यका लागि गठबन्धनका उम्मेदवार रहनु भएका खतिवडाले भन्नुभयो, ‘एमालेभित्र असन्तुष्टिको आगो यस्तो सल्किएको छ कि त्यहाँ अवसर नपाउनेहरु मात्र होइन, अवसर पाएका, निर्वाचित भएका जनप्रतिनिधिहरु पनि बस्न सकिरहेका छैनन्, आधा दर्जन निर्वाचित वडाध्यक्ष सम्पर्कमा छन्, गठबन्धन जिताउन लागेका छन् ।’ नाम सार्वजनिक गर्दा एमालेका अरिंगाल सेनाले लखेट्ने र असुरक्षित हुने भएकाले नाम भने निर्वाचनपछि मात्र सार्वजनिक गरिने खतिवडाले बताउनु भयो । खतिवडाले एमाले अध्यक्ष केपी ओली प्रतिगामी भएकाले आफूहरुले विद्रोह गरी गठबन्धन बनाएर जनताको माझमा आएको बताउनु भयो । ईन्द्रसरोवर गाउँपालिका पर्यटन विकासको सम्भावना भएको ठाउँ भएकाले यसको विकासका लागि लागिपर्ने प्रतिवद्धता जनाउँदै भन्नुभयो, ‘ईन्द्रसरोवर फेवातालको विकल्प बन्नेछ, यसबाट पर्यटकीय विकास हुनेछ ।’ खतिवडाले संघीय सरकारले सात वटा प्रदेशको सात स्थानलाई पर्यटकीय क्षेत्र भनेकोमा बागमती प्रदेशमा ईन्द्रसरोवरलाई एक नम्बरमा पारिएको बताउनु भयो । यस्तै, क्षेत्र नम्बर २ को प्रदेशसभा क का उम्मेदवार कुमारी मोक्तानले बागमती प्रदेशमा चार वर्षसम्म एमालेका डोरमणि पौडेलको सरकार भएकाले चाहेर पनि आफूले सोचजति काम गर्न नपाएको बताइन् । ‘डोरमणि पौडेल मुख्यमन्त्री भएकाले आफ्नालाई छानी छानी बजेट दिए,’ मोक्तानले भन्नुभयो, ‘चार वर्षमा विकास गर्न सकिएन, गठबन्धन बनेपछिको एक वर्षमा तपाईंहरुका लागि सकेजति बजेट ल्याइयो ।’ निर्वाचन परिचालन कार्यालय उद्घाटन नेपाली कांग्रेसका ईन्द्रसरोवर गाउँपालिकाका सभापति विश्व लामाको अध्यक्षतामा कार्यक्रम भएको हो ।